Ang tuig kay 2018 kun kanus-a nasugdan nga nakita na sa hinay-hinay ang pangandoy nga Patubig kun Water System nga proyekto alang sa Barangay Binabag. Mao unya kini ang mosupply ug tubig sa Barangay Anonang Norte, Anonang Sur, Banban, Binabag, Lapaz.

Sayud ang pangagamhanan sa Dakbayan, pinangunahan ni Mayor Carlo Martinez uban ni Vice Mayor Mayel Martinez ug ang kinatibuk-an sa Konseho sa dako gayud kaayu nga suliran sa Barangay Binabag may kalabutan sa patubig mao bisan pa man sa mga kakulian ug mga sagubangon arun molahutay gayud ang maong proyekto atua kining gipaninguhaan nga mabuhat. Kini lakip sa mga priority projects nga gisunod gayud ug gitutukan pag-ayo sa Dakbayan.

Gikan pa lang sa pagtultol sa water source dako na kaayo nga hagit. Gani, adunay tulo na nga drilling companies ang giduol sa Dakbayan nga mobuhat sa drilling sa mga gitataw nga water sources apan sa makapila nga higayun kita napakyas kay ang mao nga mga lugar, dili igo ang supply sa tubig nga nakita.

Apan kini wala nakapawng sa atuang tinguha ug mipadayun kita hangtod nga nakaluy-an sa kahitas-an nakakita na gayud ug saktong source nga adunay igo nga tubig nga makasupply.Ang mao nga source, layo sa highway. Kun atua man gayud gani nga subayun, anaa sa duha ka kilometro ang gilay-on. Tungod niini, lahi nga pagsulay ang nagpakita sama sa kuti nga paghatod sa mga materyales nga pagagamiton alang sa proyekto. Ang mga truck, dili makasulod mao nga atuang gipangitaan ug paagi nga maka-abli kita ug makapahimo ug dan arun masulbad kana nga problema.

Atuang gihangyo ang mga taw o mga tag-iya sa mga luna nga maagian unya sa mao nga proyekto. Bisan pa gani ang mga elemento sa kalikupan giapil sab nato ug hangyo pinaagi sa mga halad ug mga gimbuhaton nga base sa mga pagtuo sa mga katiguwangan arun unta wala nay puno pa nga mga babag arun makaasdang gayud ang proyekto ug mananghid nga sila walay pagbabag niini.

Ug tuod man, nakita na ang pisikal nga mga structures alang sa proyekto sama sa bag-o lang nga nahuman nga pumphouse, water tanks, power generator , chlorinator, motor pumps, mga pipes ug uban pa nga mga accessories alang unya sa mga transmission ug distribution lines ngadto na sa mga balay.

 Samtang sa pagsulat niini, padayon nga gipaspasan ug trabaho sa mga sakop sa atuang Engineering Department ug sa atuang katambayayong sa mao nga proyekto nga mao ang Bogo Water District. Atua sab nga katambayayong ang CEBECO II arun nga mapalabayan ug kuryente ang pasilidad arun mao ang mo-power sa mga ekipo unya kun kini opisyal na nato nga masugdan ug gamit.

Padayon kita nga mipatuman niini nga proyekto. Bag-o lang aduna nasay kakulian kay nagkuwang ang budget alang sa pagpataod ug supply sa kuryente sa pasilidad. Taas kaayu ang mamahimo nga proseso nasab kun adunay pagabuhaton nga pag-usab sa mga rekisitos nga mga dokumento ug tungod sa tinud-anay gayud nga tinguha ni Mayor Carlo nga di na langayun  nga kini mahuman, siya mikuot mismo sa iyahang kaugalingung bulsa arun taplan nalang ang kuwang nga kantidad kaysa mabalik nasab sa sugod ang proseso sa mga papel.

Adunay huhungihong nga ang proyekto gibabagan. Adunay pila sab nga huhungihong nga kini wala na ipadayon. Kini karon gihatagan namo ug katin-awan. Ang PROYEKTO SA PATUBIG SA BARANGAY BINABAG padayun nga gilihok ug gibuhatan ug katumanan. Gitabangan nga mapaspas ug mahuman. Sayod kita nga ubay-ubay ang naghinamhinam niini kay kadako naman gayud nga kaharuhay puhon ug improvement sa mga kinabuhi sa mga lumulupyo sa Barangay kun kini mamahimo na nga operational. Kaanindot nga usa lamang ka pamilok anaa na dayun ang atuang mga gidamgo. Apan ayaw kawala ug pag-laum kay kini nga damgo dili na magpabiling damgo puhon kay buhaton ta ang tanan arun kini inyuha na unya nga mapuslan ug matagamtaman.