Ang Dakbayan sa Bogo lakip sa pila lang ka mga LGUs tibuok nasud nga nakakuha ug taas nga evaluation mark sa gipahigayun nga Nationwide Road Clearing Operations.

Ang Bogo nakakuha ug score nga 95 over 100 sa pag-evaluate sa DILG Region 7 sa Road Clearing accomplishments niini.

Kini nga maong kalihukan sa mga LGUs subay sa mandato ni Presidente Rodrigo Roa Duterte sa iyahang labing bag-o nga State of the Nation niadtong July 22, 2019 diin iyahang gibutyag nga ang tanang mayor sa nagkadaiyang lungsod sa tibuok nasud hatagan ug di molapas sa 60 ka mga adlaw nga hawanan ang ilahang mga tagsa-tagsa ka mga karsada gilakipan sa mga major roads ug barangay roads.

Kini nga maong kamanduan pinasikad usab sa Memo Circular 2019-121 nga gikan sa DILG.

Ang mga kadalanan gilimpyuhan na sa mga illegal structures ug gipahimutang na sab ang mga designated parking areas diin kini gipangpintalan ug yellow. Lakip usab sa mga kausaban mao ang pagwagting na sa mga illegal terminals ug pagbalhin na sa mga traysikol ngadto sa karaan nga terminal nga mahimutang dapit sa bag-ong merkado.

Bisan pa man nga nahuman na ang 60-day deadline sa Road Clearing, ang Mayor miawhag sa mga implementors ug usab sa mga molupyo nga padayunon o kun isustenar ang kahapsay sa kadalan.