Oktubre 15, 2018  – Giawhag sa kagamhanan sa Dakbayan sa Bogo ang mga Bogohanon sa paghimo ug sayo nga pagpangandam alang sa umaabot nga Kalagkalag arun dili maatlan sa gitataw nga pagsaka sa presyo sa pamaliton tungod sa peak season.

Kini human mihimo ug lakang ang LGU sa pagpatawag ug meeting kauban ang DTI, DA, ug Market Admin arun sa pagsusi sa kahimtang sa presyo sa mga pamaliton sa merkado hilabi na gayud ang mga wet goods o karne sama sa isda, manok, ug baboy ug arun usab mapangitaan ug sulosyun kini nga suliran.

Sa maong pulong-pulong giesplekar sa head sa Department of Agriculture ug sa representante sa Department of Trade and Industries-Bogo nga usa sa dakong basehan sa pagsaka sa pamaliton sa Dakbayan mao ang law of supply and demand ug ang padayong pagsaka sa presyo sa gasulina.

“Tungod sa padayun nga pag-abante sa Dakbayan sa Bogo miduyog sab ang pagdasok sa mga taw nga nanimuyo dinhi mao nga nagsige ug saka ang demand sa mga goods apan nihit ang supply nato diri mao nga taas gyud gamay ang presyo kumpara sa ubang lugar. Kay pananglitan ang isda, tungod kay gamay man ang supply, ang isda gibyahe pa hinungdan nga mapatungan gyud kay nagmahal naman sab gyud ang gasulina. Usa sab na nga dako nga factor ang pagsaka sa presyo sa gasulina”, sigun ni Janet Verallo , tigpamaba sa DTI-Bogo.

“Ang long term solution man gud niini dili mahimo nga dalidali nga mabuhat maong sa pagkakarun samtang nakigtambayayong pa ta sa local nga kagamhanan alang sa maong posibling solusyon, hangyuon usa nato ang atong mga lumulupyo sa paghimo lang sa mga ginagmay nga lakang aron makapagaan-gaan ang sagubangan nila,usa na ana nga paagi ang pagpananum ug mga utanon ug sama niini nga adunay nagsingabot nga peak season, hinaut nga mangompra na sila daan samtang layo pa arun sila maka-save”, dugang niya.

Gipasalig sa DTI nga andam sila modawat ug mga reklamo o ni bisan kinsa nga gusto ug katin-awan,buhata lang ang pagdangop sa ilahang buhatan nga anaa sa likod sa Bag-ong City Hall sa Bogo.