January 22, 2021, Bogo City – Aduna nay City Veterinary Department ang Dakbayan sa Bogo. Kini human hingpit na nga nacreate and opisina sa City Vet Dept. lakip na ang pag-hire ni Dr. Lalaine delos Angeles isip City Veterinarian.

Subay unya niini mao ang mamahimo nga mga kalahian ug improvements sa mga operasyun may kalambigitan sa mga hayop, panghayop lakip na sab ang pagpadagan sa Slaughterhouse sa Dakbayan nga kanhi ubos sa management sa Market Administration.

Ang labing una nga mga programa nga gibuhat sa mao nga naugmad nga opisina mao ang paghatag ug libre nga pagpamakuna sa mga alaga nga hayop lukop sa tanang barangay lakip na ang serbisyo sa libre nga pangpangapon sa mga iro. Libre nga mga bitamina gipanghatag usab dili lamang sa mga house pets apan lakip na sab ang mga livestock kun mga kanding, baka, kabaw , ug uban pa.

Gisugdan na sab ug han-ay sa atuang bag-ong city veterinarian ang paghan-ay na sa mga gikinahanglan nga mga ekipo sa City Slaughterhouse lakip sab ang pag-hire sa mga butchers ubos sa LGU. Kasamtangan adunay baynte (20) ka mga Newly hired LGU-Bogo butchers alang sa atuang Bogo City Slaughter House. Sila gipaubos na sa orientation.

“Ang atuang tinguha mao nga makahatag kita  ug luwas ug limpyo nga karne alang sa mga kunsumedor mao nga padayun ang atuang pag-improve sa atuang kasamtangang slaughterhouse pinaagi sa pagpuno ug pa nindot sa pasilidad ug pag-hire sa mga butchers nga sakop na unya sa LGU arun mas mabantayan ug masiguro ang ilahang trabaho nga sakto ug limpyo”, sigun pa ni Delos Angeles.

“Pinaagi sab niini atua nga maregulate ug tarong arun maaksyunan dayun kun anaa man gani kita nga madawat nga mga reklamo sama sa miagi nga reklamo sa laplap ug uban pa”, dugang pa niya.

-30-