January 22, 2021, Bogo City – Gipang apod-apod sa Kapitolyo pinaagi sa mga kawani sa opisina ni Provincial Board Member Celestino “Tining” Martinez III ang mga Sugbo Negosyo “kits” ngadto sa mga benepisyaryo sa maong programa sa Dakbayan sa Bogo.

Ang SUGBO Negosyo (Sustainable Upliftment and Growth through Business Opportunities), usa ka programa sa Cebu Provincial Capitol nga nagkanayon nga tabangan ang mga gusto magnegosyo ug gagmay nga mga negosyante nga naapektuhan gayud sa COVID19 pandemic.

Ang maong programa nabahin sa tulo ka mga kategorya: Negosyong Padayonon” sa Category A, “Produktong Sugbuanon” sa Category B, ug “Mga Serbisyo ug Ginagmay’ng Patigayon” sa Category C.

Ang mga benepisyaryo sa Category A mahatagan og capital nga magkantidad og PHP50,000 pinaagi sa paghatag og mga butang, ekipo o raw materials nga kinahanglanon sa ilang mga negosyo. Samtang P20,000 ang gigahin sa Category B ug P10,000 sa Category C.

Apan dili basta-basta ang pagpili sa mga benepisyaryo, ang tanang mi-apply gipaubos og striktong ebalwasyon sa Provincial Board, Department of Trade and Industry (DTI) ug uban pang mga ahensiya nga gitahasan nga mo-evaluate sa mga aplikasyon.

-30-