Dakbayan sa Bogo, Cebu, Hulyo 13, 2017 – Mga dos cientos ka mga tawo ang nakapahimulos sa Special Breakthrough Services (SBS) sa miaging Hulyo 11, 2017 nga gipahigayon sa Dakbayan sa Bogo isip pagsaulog sa World Population Day.

Ang mga nangapil sa maong aktibidad gibahin-bahin sa upat ka mga komunidad – couples, senior citizens, lalaki ug kabatan-onan.

Sa tagsa-tagsa ka komunidad, serbisyo nga haom sa ilang panginahanglan ang gihatag. Gitudloan ang mga couples unsaon nga mahimo sila nga responsable nga mga ginikanan ug ang pagplano sa pamilya. Sa mga senior citizens, mihatag ang Center for Traditional and Alternative Medicine og mga impormasyon kabahin sa saktong nutrisyon sa mga edaran. Ang mga lalaki gitudloan unsaon pagkab-ot ang papel sa usa ka responsable ug moderno nga amahan, samtang ang mga kabatan-onan gipaagi sa U4U Teen Trail nga mihatag kanila og impormasyon sa paglikay sa sayo nga pagmabdos ug mga sakit ng makuha sa pakighilawas.

Mitambong sa maong aktibidad ang taga-Departamento sa Panglawas aron mopahigayon og libre nga HIV Screening. Samtang ang PhilHealth mipasabot sa komunidad sa mga nagkalain-laing benipesyo sa mga miyembro.

Ang SBS gi-organisa sa Cebu Provincial Government, Commission on Population 7 ug sa Dakbayan sa Bogo isip pagsaulog sa tinuig nga World Population Day. Kinig naglaum nga matagaan og pagtagad ang mga isyu sa populasyon. Karong tuiga, ang tema mao ang “Family Planning: Empowering People, Developing Nations.”